Manila --- Magandang araw po sa inyong lahat, mga giliw kong tagatangkilik ng kolum na ito. Sana ay nasa mabuti kayong kalagayan saan mang panig ng mundo kayo naroroon. Ako nama’y nasa maayos ding pangangatawan, bagama’t masyadong abala ay hindi naman po ako nagpapabaya sa aking kalusugan.
Nakakatuwang malaman na mabenta ang tiket para sa nalalapit naming laban ni Ginoong Shane Mosley sa Mayo 7 sa MGM Grand sa Las Vegas.
Nakarating po sa akin ang magandang balita na sa loob lamang ng 3 oras ay 16K agad ang nabentang tiket.
Nakakataba ng puso, hindi po ba? Na ngayon pa lamang ay marami na ang interesado sa aming laban. Imagine, 16 thousand tickets sold in just three hours, ‘yan ay ayon sa aking promoter.
Nangangahulugan lamang na hindi totoo ang sinasabi ng ilan, na walang may manonood ng aming laban. Ang pagka-sold out ng tiket sa unang labas pa lamang ay matibay na ebidensiya na buhay na buhay talaga ang larong boksing. Walang katotohanan ang sinasabi ng ilan na ‘patay’ ang boksing at walang manonood sa laban namin.
Ibig sabihin rin nito, na mas marami ang naniniwalang isa na namang kapanapanabik na laban ang kanilang aabangan sa Mayo.
Ibig sabihin din ng balitang ito, mahal ako ng tao. Kaya naman, susuklian ko ang pagmamahal na iyan ng ibayong paghahanda upang muli na naman nating makamit ang tagumpay.
Nabasa ko rin ang sinabi ni Ginoong Mosley na kaya niya akong talunin dahil madali naman daw akong tamaan.
‘Yan po ang aking paghahandaan. Sa tulong ng aking trainer at iba pang makakasama sa training camp, gugugol po kami ng panahon upang ma-counter ang anumang ibabato sa akin ng kalaban.
Katulad po ng dati, muli kong hihingin ang inyong tulong at suporta, hindi sa pisikal, kundi sa ispiritwal na aspeto, upang sa bandang huli, tayo pa rin ang magbubunyi.
Maraming salamat sa patuloy ninyong pagtangkilik sa aking laban.
